ഉയര്‍ന്നു പറക്കുന്ന പറവ 

സ്വാഭാവിക അഭിനയം കൊണ്ട് പ്രേക്ഷക പ്രശംസ പിടിച്ചു പറ്റിയ സൗബിൻ ഷാഹീർ സംവിധാനം ചെയ്യുന്ന ആദ്യ ചിത്രം.. 

ബാംഗ്ലൂർ ഡേയ്സ് പ്രേമം എന്നീ സൂപ്പർ ഹിറ്റുകൾക്ക് ശേഷം അൻവർ റഷീദ് നിർമ്മിക്കുന്ന ചിത്രം... 

രണ്ട് വർഷങ്ങൾ കൊണ്ട് പൂർത്തീകരിച്ച ചിത്രീകരണം... 

ഇങ്ങനെ പല കാരണങ്ങൾ കൊണ്ട് ശ്രദ്ധിക്കപ്പെട്ട പറവ തീയറ്ററിൽ പറന്നുയർന്നപ്പോൾ അത് മലയാളത്തിനു അത്ര പരിചയമില്ലാത്ത സിനിമ അനുഭവമാവുന്നുണ്ട്.എന്നിരുന്നാലും പ്രേക്ഷകപ്രതീക്ഷക്കൊപ്പം പറവ പറന്നുയര്‍ന്നിട്ടുണ്ടോ എന്നത് സംശയമാണ്. 

പറവ പോലെ ഉയര്‍ന്നും താഴ്ന്നും സഞ്ചരിക്കുന്നവരുടെ ജീവിതമാണ് സിനിമ പറയുന്നത്. പ്രാവ് പറത്തൽ വിനോദവും മത്സരവുമായി കരുതുന്ന മട്ടാഞ്ചേരിക്കാരുടെ കഥയാണ് അല്ല ജീവിതമാണ് ഈ സിനിമ. പ്രാവുകളെ ജീവന് തുല്യം സ്നേഹിക്കുന്ന ഇർഷാദ് , ഹസീബ് എന്നീ കൂട്ടുകാരില്‍ തുടങ്ങി അവരുടെ കണ്ണുകളിലൂടെ ,മട്ടാഞ്ചേരിയുടെ ഇടവഴികളിലൂടെ , അനേകം ജീവിതങ്ങളിലൂടെ നമ്മളെയും സഞ്ചരിപ്പിക്കുന്നതാണ് ചിത്രത്തിന്റെ കാതല്‍. 

ഇർഷാദിന്റെ ഇക്കയായി ഷൈൻ നിഗവും , വാപ്പയുടെ വേഷം കാഴ്ച വെച്ച സിദ്ധിക്കും, ഹരിശ്രീ അശോകനും മികച്ച പ്രകടനമായിരുന്നു. ഏതാണ്ട് ഇരുപത്തഞ്ചു മിനിറ്റ് മാത്രം പ്രത്യക്ഷപ്പെടുന്ന കഥാഗതിയിൽ വളരെയധികം പ്രാധാന്യമുള്ള ഒരു കഥാപാത്രം ആയി ദുൽഖർ സൽമാനും സിനിമയില്‍ എത്തുന്നുണ്ട്. ശ്രീനാഥ് ഭാസി, ഷൈൻ ടോം ചാക്കോ, ഇന്ദ്രന്‍സ്, ജാഫര്‍ ഇടുക്കി, ശ്രിന്ദ, ഗ്രിഗറി ജേക്കബ് എന്നിവരും തങ്ങളുടെ റോള്‍ ഭംഗിയാക്കി. 
സംവിധായകന്‍ സൗബിന്‍ പ്രതിനായക വേഷത്തില്‍ തിളങ്ങിയപ്പോള്‍ ആഷിക് അബുവും ചെറിയ റോളില്‍ എത്തുന്നുണ്ട്. അതോടെ ചിത്രത്തിന് വലിയ ഒരു താര നിര തന്നെ അവകാശപ്പെടാം. കുട്ടികളുടെ ലോകം പറവയാണെങ്കിലും അവരുടെ സ്കൂളും, വീടും, കൂട്ടുകാരും, നാട്ടുകാരും, നല്ല കാഴ്ചാ സന്ദര്‍ഭങ്ങള്‍ നല്‍കുന്നുണ്ട്. ആശ്വാസത്തിന് മാത്രം നര്‍മ്മ മുഹൂര്‍ത്തങ്ങള്‍ നല്‍കുന്നുള്ളൂ. ദുൽഖറിന്റെ എൻട്രിക്ക് ശേഷം സിനിമയുടെ ഫോക്കസ് അദേഹത്തിന്റെ കൂട്ടുകാരിലേക്ക് നീങ്ങുന്നുണ്ട്. 

സിനിമയില്‍ എത്തുന്ന അഭിനേതാക്കള്‍ അഭിനേതാക്കളായി തോന്നിയില്ല എന്നതാണ് സൗബിന്റെ കാസ്റ്റിങ്ങിന്റെ വിജയം. കാസ്റ്റിങ്ങില്‍ പ്രാവുകളും പെടും .കവലമുക്കില്‍ ചായ കുടിക്കുന്നവര്‍ മുതല്‍ സ്കൂളിലെ ടീച്ചര്‍ പോലും നാച്ചുറല്‍ ആയി തന്നെ തോന്നി. ലിറ്റില്‍ സ്വായമ്പ് പോളിന്‍റെ ക്യാമറയാണ് പറവയിലെ താരം. പ്രാവുകള്‍ക്കൊപ്പം ആ ക്യാമറ പറക്കുകയായിരുന്നു, സംഘട്ടന രംഗങ്ങള്‍ക്കൊപ്പം ഒഴുകുകയായിരുന്നു. വിരസത അനുഭവപ്പെടെണ്ടേ പല രംഗങ്ങളെയും രക്ഷപ്പെടുത്തിയെടുക്കാന്‍ റെക്സ് വിജയന്‍റെ പശ്ചാത്തലസംഗീതത്തിനു കഴിഞ്ഞു. ചോക്കുകള്‍ കൊണ്ട് ചുവരിൽ എഴുതി ചേർക്കുന്ന ക്രെഡിറ്റ്സില്‍ തന്നെ ഒരു പുതുമയുണ്ടായിരുന്നു. മഹേഷിന്റെ പ്രതികാരത്തെ അനുസ്മരിപ്പിക്കും വിധം സംഘട്ടന രംഗങ്ങള്‍ വളരെ നാച്ചുറലായി തോന്നി. 

കൊച്ചി സിനിമകള്‍ ധാരാളം കണ്ടു പരിചയമുള്ള മലയാളിക്ക് ഇത് വരെ കാണാത്ത ഒരു കൊച്ചിക്കാഴ്ചയാണ് പറവ. എന്നാല്‍ അല്‍പ്പം കൂടി കെട്ടുറപ്പുള്ള കഥയും, ആദ്യ പകുതിയോളം ഉയരുന്ന രണ്ടാം പകുതി കൂടി ഉണ്ടായിരുന്നെങ്കില്‍ ഈ വര്‍ഷത്തെ ഏറ്റവും മികച്ച ചിത്രങ്ങളുടെ പേരില്‍ പറവയും വട്ടമിട്ട് പറക്കുമായിരുന്നു.